Vanderbijlpark inwoners gewaarsku oor ‘n beplande kragonderbreking vandag

VANDERBIJLPARK - Die Emfuleni Plaaslike Munisipaliteit het 'n kennisgewing uitgereik dat sommige dele van Vanderbijlpark vandag 'n kragonderbreking sal ervaar. In 'n verklaring het die munisipaliteit verbruikers van die Emerald Resort & Casino, dele van die SE-gebiede, SW-gebiede, Mantevrede, Flora Gardens en Vaal Mall in kennis gestel van die beplande kragtoevoeronderbreking wat vandag in werking tree. Die onderbreking sal vanoggend om negeuur begin en sal vanaand om sesuur eindig. Volgens ELM is die rede vir die kragonderbreking weens onderhoud aan twee van die stroombrekers by die Frikkie Meyer-substasie. Die munisipaliteit sê verder geen waarborg kan gegee word dat die kragtoevoer vir die hele duur van die onderbreking af sal bly nie en inwoners moet steeds alle elektriese toestelle en stroombane as lewendig hanteer. Inwoners wat meer inligting verlang, kan die Emfuleni Plaaslike Munisipaliteit se Elektrisiteitsbeheerkamer kontak by 065 871 7483.

FOTO'S: (Emfuleni Local Municipality op Facebook; Verskaf)